ភ្នំពេញ៖ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានអញ្ជើញត្រឡប់មកមាតុភូមិវិញកាលពីយប់ថ្ងៃទី១៧ ខែកញ្ញា ឆ្នាំ២០២៣ ប្រកបដោយលទ្ធផលផ្លែផ្លា ក្រោយពីសម្តេចបានអញ្ជើញទៅទស្សនកិច្ចនៅចិនអស់រយៈពេល៤ថ្ងៃកន្លងមកនេះ។
រដ្ឋមន្រ្តីប្រតិភូអមនាយករកដ្ឋមន្រ្តី លោក តាន់ ហ្សង់-ហ្រ្វង់ស័រ បានគូសបញ្ជាក់នៅក្នុងសន្និសីទសារព័ត៌មានស្តីពីលទ្ធផលនៃជំនួបរវាងរាជរដ្ឋាភិបាលកម្ពុជា និងរដ្ឋាភិបាលចិន នាយប់ថ្ងៃទី១៧ ខែកញ្ញា ឆ្នាំ២០២៣ថា ដំណើរទស្សនកិច្ចរបស់នាយករដ្ឋមន្ត្រីអាណត្តិថ្មីទៅចិននេះ ស្របពេលកម្ពុជា និងចិនឆ្នាំ២០២៣នេះ គំរួបខួបនៃកិច្ចទំនាក់ទំនងការទូត៦៥ឆ្នាំ។
បើតាម លោក តាន់ ហ្សង់-ហ្រ្វង់ស័រ នៅក្នុងជំនួបរវាងរាជរដ្ឋាភិបាលកម្ពុជា និងចិន ភាគច្រើនក្រៅពីពិភាក្សាគ្នាលើរឿងនយោបាយ និងភូមិសាស្ត្រនយោបាយ ភាគីទាំងពីរ បានចំណាយពេល៧០ភាគរយជជែកពិភាក្សាគ្នាផ្តោតលើកិច្ចសហប្រតិបត្តិការសេដ្ឋកិច្ចពាណិជ្ជកម្មសម្រាប់ទាញយកផលប្រយោជន៍គ្នាទៅវិញទៅមក។
លោកថ្លែងថា៖«ចិនគ្មានសង្ឃឹមអ្វីទាញយកផលប្រយោជន៍សេដ្ឋកិច្ចពីកម្ពុជានោះទេ មិនរកស៊ីជាមួយកម្ពុជាក៏ចិនមិនធ្លាក់ក្រ រកស៊ីជាមួយកម្ពុជាក៏គាត់(ចិន)មិនកើនមានលើសដើមដែរ តែផ្ទុយទៅវិញបើកម្ពុជាមានទំនាក់ទំនងសហប្រតិបត្តិការសេដ្ឋកិច្ចពាណិជ្ជកម្ម វិស័យថាមពលជាមួយចិន នោះកម្ពុជានឹងអាចទាញយកប្រយោជន៍សេដ្ឋកិច្ចពីចិន»។
លោកគូសបញ្ជាក់ថា នៅប្រទេសណាក៏ដោយដែលនាំមកនូវប្រយោជន៍សេដ្ឋកិច្ចពាណិជ្ជកម្មដែលជំរុញឱ្យកម្ពុជាបន្តអភិវឌ្ឍទៅមុខ គឺកម្ពុជាមិនរារែកក្នុងការទាក់ទងជាមួយនោះទេ ពោលកម្ពុជាក៏មិនចាត់ទុកប្រទេសមួយជាសត្រូវនោះទេ។
បើតាមលោក តាន់ ហ្សង់-ហ្រ្វង់ស័រ ប្រទេសចិនជាប្រទេសជាប់លេខ១ដែលវិនិយោគលើវិស័យជាច្រើននៅកម្ពុជា ខណៈហេដ្ឋារចនាសម្ព័ន្ធដែលកម្ពុជាកំពុងតែបន្តអភិវឌ្ឍទៅមុខនេះ គឺបានមកពីភាគីចិនបានផ្តល់ជំនួយមកកម្ពុជា។ លោកអះអាងថា ចិនបានប្តេជ្ញាច្បាស់ថានឹងបន្តជួយដល់មាគ៌ាអភិវឌ្ឍប្រទេសកម្ពុជា និងជំរុញសន្ទុះនៃកំណើនសេដ្ឋកិច្ចនៅកម្ពុជាឱ្យមានការរីកចម្រើនទៅមុខ។
លោកថ្លែងថា៖«ហេដ្ឋារចនាសម្ព័ន្ធទាំងអស់នេះសុទ្ធសឹងជា ឬនឹងក្លាយជាសរសៃឈាមម៉ាក្រូ ឬមីក្រូសេដ្ឋកិច្ចសម្រាប់ការអភិវឌ្ឍសេដ្ឋកិច្ចកម្ពុជា។ ប្រទេសចិនដើរតួធំសម្បើមណាស់នៅក្នុងមាគ៌ាអភិវឌ្ឍកម្ពុជា»។
លោកបានប្រាប់ឱ្យដឹងថា ក្នុងដំណើរទស្សនកិច្ចនេះ ភាគីចិន និងកម្ពុជាបានប្តេជ្ញាពង្រឹងភាពជាដៃគូឱ្យបានយូរអង្វែង និងពង្រឹងកិច្ចសហប្រតិបត្តិការគ្នាបន្ថែមទៀតលើវិស័យសេដ្ឋកិច្ច ពាណិជ្ជកម្ម ជាពិសេសវិស័យថាមពល វិស័យកសិកម្ម វិស័យអប់រំ និងវិស័យការផ្លាស់ប្តូរប្រជាជន និងប្រជាជន។
លោកបន្តថា ភាគីកម្ពុជា និងចិន ក៏បានចុះហត្ថលេខាលើឯកសារចំនួន១៥ ដោយផ្តោតលើផែនការសកម្មភាពក្នុងការកសាងវាសនារួមរបស់កម្ពុជាសម្រាប់ឆ្នាំ២០២៤ ដល់ឆ្នាំ២០២៨ រវាងកម្ពុជា និងចិន ដើម្បីជំរុញឱ្យប្រទេសកម្ពុជាក្លាយជាប្រទេសត្បូងពេជ្រ៕
